Skip to main content
2023.11.22

FUNTSEZKOAK

BAREAk Merkatari Elkartetik egiten ditugun kanpainen helburu nagusietako bat, herritarrengan, bertakoa kontsumitzeak duen garrantziaren inguruko kontzientzia sortzea da. Horretarako hainbat ekintza jarri ditugu abian urtean zehar, eta hemendik urte amaierara bitartean ere, hainbat kanpaina gauzatuko ditugu.

Ekintza horien artean azpimarratu nahi dugunetako bat “FUNTSEZKOAK” izeneko sentiberatze kanpaina da. Gaurtik aurrera mezu hori zabaltzen joango gara herriko gune ezberdinetan, eta euskarri ezberdinen bidez. Lehengo urteko ZURE, NIRE, HERRIARENGATIK kanpainaren bigarren atala bezala  ulertu daiteke kanpaina hau. Pasa den urtean tokiko merkataritzak herriko oreka ekonomikoan eta gizarte-ongizatean duen eragina azpimarratu nahi izan genuen. Aurten, haratago joan izan nahi dugu. Saltokietan gauden pertsonak aurrera pauso bat eman, eta herriari eta herritarrei eskaintzen dioguna balioan jarri nahi izan dugu. Kontziente gara gaur egun produktuak edozein tokitatik eta edozein modutan eskuratzeko aukera daukagula, baina tokiko merkataritzak eskaintzen duen gertutasun eta konfiantza hori azaleratu nahi izan dugu, hori ezin baita beste motatako erosketa batzuen bidez eskuratu. Kanpaina kaleratzeko hainbat euskarri erabiliko ditugu. Alde batetik herriko markesina, udaleko pantaila eta hedabideetan jarriko diren mezuak, eta bestetik, abenduan kaleratuko den bideo bat.  

Horretaz gain, gabonei begira elkarteak egiten dituen hainbat ekintza ere sentiberatze kanpainarekin lotu nahi izan ditugu. Urte batzuk daramatzagu herriko beste elkarte eta eragile batzuekin elkarlanean, ezinbestekotzat hartzen baitugu gure arteko harremanak egonkortzen joatea. Hori dela eta, Beasaingoa den “Balu” artistarekin harremanetan egon gara, eta gabonetara begira oparitzen ditugun poltsak, berak egindako artelana eramango dute inprimatuta. Eskerrak eman nahi dizkiogu berriro ere Baluri lehengo momentutik erraztasunak jartzeagatik, gurekin lanerako prest eta gogotsu egoteagatik, eta elkartearentzat horrelako artelana sortzeagatik. Mila esker!

Gabonei begira egingo diren ekintzei ere aipamen bat egiteko aprobetxatuko dugu momentu hau: erosketa bonuak egongo dira, gabon saskiak, txu-txu trena, erakusleiho lehiaketa udalarekin elkarlanean, eta abar.

Beasainen behar dugun guztia eskuratu dezakegu aukera zabala, gertukoa, eta konfiantzazkoa baititugu. Gauzak horrela, elkartetik herriarentzat eta herritarrentzat egiten ditugun ekintzak eragina izan dezaten espero dugu.


Gure taldeko kide izan nahi baduzu, bidaliguzu zure helbide elektronikoa eta ahalik eta lasterren jarriko gara zurekin harremanetan.

KONTAKTUA

Zaldizurreta, 5 20200 BEASAIN
943 087 988 | 688 887 538
Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko.